Sekretari shtetëror në Ministrinë e Mbrojtjes së Serbisë, Nemanja Staroviq, tha sot se është e nevojshme të insistohet në thirrjen e një sesioni të jashtëzakonshëm të Këshillit të Sigurimit të OKB-së për Kosovën dhe të diskutohet “për situatën shumë të vështirë të serbëve” në veri.
Staroviq tha për RTS se edhe pse kryeministri i Kosovës Albin Kurti, pretendon se ka dy muaj që ka deeskalim në terren, kjo është larg së vërtetës.
“Kërkesa për një seancë të jashtëzakonshme të Këshillit të Sigurimit të OKB-së është një veprim shumë i rëndësishëm që do të jetë i dobishëm në drejtim të zbatimit të mëtejshëm të politikës së Serbisë dhe në kuadër të mbrojtjes së interesave të popullit serb që jeton në Kosovë”, ka thënë Staroviq, përcjell teve1.info.
