Kryeministri i Mbretërisë së Bashkuar, Keir Starmer, ka theksuar edhe njëherë mbështetjen e tij për një zgjidhje të qëndrueshme me dy shtete në Lindjen e Mesme, duke u distancuar qartë nga çdo perceptim se kjo do të përbënte një “shpërblim” për grupin palestinez Hamas.
Në një deklaratë të fuqishme ku njoftoi edhe njohjen e shtetit palestinez, Starmer ndër të tjera shtoi se: “Hamasi është një organizatë brutale terroriste. Thirrja jonë për një zgjidhje të vërtetë me dy shtete është krejt e kundërta e vizionit të tyre plot urrejtje.”
Ai sqaroi se çdo përpjekje për një zgjidhje paqësore nuk do të përfshijë Hamasin në ndonjë formë:
“Pra, jemi të qartë: kjo zgjidhje nuk është një shpërblim për Hamasin, sepse do të thotë që Hamasi nuk mund të ketë të ardhme, asnjë rol në qeveri, asnjë rol në siguri.”
Starmer rikujtoi se Mbretëria e Bashkuar e ka shpallur tashmë Hamasin si organizatë të ndaluar dhe të sanksionuar dhe theksoi angazhimin e tij për të vazhduar këtë linjë të ashpër ndaj grupit:
“Ne tashmë e kemi ndaluar dhe sanksionuar Hamasin, dhe do të shkojmë më tej. Kam udhëzuar punën për të sanksionuar figura të tjera të Hamasit në javët e ardhshme.”
Megjithatë, Kryeministri shprehu shqetësim të thellë për krizën humanitare në Gaza, duke e cilësuar situatën si jashtëzakonisht të rëndë dhe të papranueshme:
“Ndërkohë, kriza humanitare e shkaktuar nga njeriu në Gaza arrin thellësi të reja.”
Ai kritikoi ashpër ofensivën e fundit izraelite, duke përshkruar një situatë që ka sjellë pasoja të tmerrshme për civilët palestinezë:
“Bombardimi i pamëshirshëm dhe në rritje i Gazës nga qeveria izraelite, ofensiva e javëve të fundit, uria dhe shkatërrimi janë krejtësisht të patolerueshme.”
Ai përmendi viktimat e shumta nga ofensiva izraelite dhe pohoi se një gjë e tillë duhet të marr fund.
Ai poashtu i bëri thirrje qeverisë izraelite të ndalojë “taktikat mizore” dhe të lejojë “rritje të ndihmës”.
“Ne i bëjmë përsëri thirrje qeverisë izraelite që të heqë kufizimet e papranueshme në kufi, të ndalojë këto taktika mizore dhe të lejojë që ndihma të vërshojë. Me veprimet e Hamasit, përshkallëzimin konfliktit nga qeveria izraelite dhe përshpejtimin e ndërtimit të vendbanimeve në Bregun Perëndimor, shpresa për një zgjidhje me dy shtete po venitet. Por nuk mund ta lëmë këtë dritë të shuhet”, pohoi Starmer.
