Kritikat Bruskelit nuk ia ndanë asnjë moment për mos-ndëshkimin e Serbisë për Sulmin në Banjskë.
Por për ironi, pala kosovare e cila po ankohet për mos-ndëshkimin e Serbisë ende, as sot e kësaj dite, nuk I ka dërguar Brukselit raportin final të hetimeve për atë që kishte ndodhur më 24 shtator.
Kështu ka bërë të ditur zëdhënësi i BE-së Peter Stano duke thënë se: “Deri më tani, ne nuk kemi parë një raport të tillë, këtu në Bruksel”.
Nga ana tjetër, Stano ka refuzuar të komentojë takimin e zhvilluar në mes të ambasadorit serb në Amerikë, Marko Gjuriq dhe kryekriminelit Milan Radoiçiq, i cili edhe vet e ka pranuar organizimin e këtij sulmi.
“Nuk na takon neve të komentojmë për secilin takim të përfaqësuesve të administratës serbe. Por kë e takoni ju, kjo para së gjithash flet për vet juve, veçanërisht nëse është fjala për takim me një të dyshuar për aktivitete kriminale. Por kur është fjala për sulmin në Banjskë, qëndrimi i Bashkimit Evropian mbetet i njëjtë. Jemi në pritje të raportit zyrtar përfundimtar nga hetimet dhe më pas do të shohim se si do të sigurohet llogaridhënia. Deri më tani, ne nuk kemi parë një raport të tillë, këtu në Bruksel”, u shpreh zëdhënësi i BE-së, Peter Stano.
Kujtojmë se shefi i diplomacisë evropiane Josep Borrell, e kishte cilësuar sulmin e 24 shtatorit si terrorist.
Bashkimi Evropian nuk ka ndërmarrë asnjë veprim kundrejt Serbisë për shkak të Banjskës, pasi Brukseli prêt përfundimin e hetimeve zyrtare të cilat duhet t’i zhvillojnë autoritetet e Kosovës, e të cilat po zvarriten tash e sa kohë.
Kohë më parë kryeministri Kurti ka kritikuar Prokurorinë në vend për mungesën e ngritjes së aktakuzave ndaj kriminelëve që shkaktuan Banjskën, më 24 shtator të vitit të kaluar.
