Kryetari i Komunës së Gjakovës, Ardian Gjini, ka bërë të ditur se së shpejti do të nisin punimet edhe për mbulimin dhe ndriçimin e stadiumit të qytetit.
Në një postim në Facebook, Gjini ka thënë se është arritur marrëveshja me Ministrinë për Kulturë, Rini e Sport për financimin e kësaj faze të rinovimit të stadiumit.
“Kam kënaqësinë t’ju njoftoj se sot u nënshkrua kontrata për mbulesën dhe ndriçimin e stadiumit të qytetit në Gjakovë.
Ky është një hap i madh dhe mjaft i ndjeshëm në kuadër të njërit prej projekteve më të mëdha dhe më ambicioze të ndërtuara ndonjëherë në vendin tonë. Financimi i kësaj faze mbulohet nga Ministria e Kulturës, Rinisë dhe Sportit dhe për këtë shpreh falënderim për Ministrin Çeku dhe bashkëpunëtorët e tij. Ashtu si gjithmonë, Komuna e Gjakovës mbetet e përkushtuar në përmbushjen e përgjegjësive të saj. Jam i bindur se shumë shpejt qytetarët e Gjakovës dhe të Kosovës do ta shohin këtë stadium të shpaloset në të gjithë madhështinë e vet.”
