Në qershor të këtij viti ishte përuruar projekti i stacionit të ri të autobusëve në qytetin e Podujevës. Mirëpo ende po vazhdon që ky stacion të jetë jashtë funksionit. Nga komuna thonë se tanimë kanë përfunduar të gjitha procedurat dhe pritet të hyjë në funksion. E kritika ka nga opozita në Podujevë.
Shiriti ishte prerë në qershor të këtij viti.
Por, pesë muaj pas, ky stacion i autobusëve në Podujevë ende nuk është funksionalizuar.
E nga Lidhja Demokratike e Kosovës në këtë komunë këtë po e shohin shqetësuese.
“Projekti i stacionit të autobusëve është tepër i rëndësishëm pasi ndikon direkt tek qytetarët por në qershor të këtij viti është prerë shiriti por funksionalizimi nuk ka ndodh ende. Është shqetësuese pasi ekzekutivi nuk ka një plan konkret ose me një përgjigje zyrtare se kur do të ndodh zyrtarizimi apo pritet të përdorët për vitin e ardhshëm në fushatë apo çfarë është telashe”, tha Qëndrim Sofftolli nga dega e LDK-së në Podujevë.
E drejtori i Shërbimeve Publike në Podujevë, Bahri Selimi, tregon se cilat janë problemet që kanë hasur deri më tani.
“Më saktësisht me 19 qershor është bërë inaugurimi i stacionit të autobusëve. Kanë qenë disa procedura që nuk kanë qenë të parapara në kontratën aktuale që më konkretisht ka qenë kyçja e energjisë elektrike. Në fillimisht në kontratë kemi vlerësu që mund të kyçemi në një trafo ku është afër stacionit, e që në fund ka dal nga KEDS-i që nuk i plotëson kushtet ajo trafo me kapacitetet e saj me furnizu me energji elektrike stacionin e autobusëve”, tha Selimi.
Por gjatë ditës, Selimi bëri të ditur se është njoftuar se kanë përfunduar të gjitha procedurat dhe është bërë kyçja e stacionit në energji elektrike.
Tani zyrtarët kanë filluar të bartin pajisjet në stacionin e ri.
Brenda javës do të jenë edhe autobusët të cilët vazhdojnë të qëndrojnë në stacionin e vjetër në Podujevë.
