Në moshë 39-vjeçare, ka ndërruar jetë kampioni i shumëfishtë i Kosovës në hendboll, Valbon Shala.
Lajmin për vdekjen e Shalës, e ka bërë të ditur edhe klubi i tij i dikurshëm KH Besa.
“E nderuara familje e Valbon Shalës ! Lajmi për vdekjen e Valbonit na ka pikëlluar të gjithëve , jemi të shokuar. Ju shprehim ngushëllimet tona më të thella dhe më të sinqerta ! Gjatë kohës sa ishte pjesë e klubit tonë , Valboni ishte shembull se si luftohet për ngjyrat e klubit ! Në këto momente të dhimbjes së madhe jemi pranë jush që ta përballoni më lehtë dhimbjen për më të dashurin tuaj!” – ka shkruar Besa në Facebook.
Shala ka luajtur shumë gjatë me skuadrën e Besës, derisa me ekipin e tij të vendlindjes ka fituar shumë tituj të kampionit dhe kupa te Kosovës. Ndërsa me mjaft sukses për ekipin e qytetit të tij ka zhvilluara edhe lojëra në garat evropiane. Ai ishte pjesë e Besa Famiglia në debutimin evropian, në vitin 2005. Ka luajtur në garat evropiane deri në vitin 2012.
Presidenti i Federatës së Hendbollit te Kosovës, Eugen Saraçini, ka dërguar telegram ngushëllimi familjes Shala.
“Mbetëm të shokuar kur na njoftuan për ndarjen nga jeta të Valbonit, një djaloshi të dashur nga të gjithë ne. Kontributi i tij për hendbollin pejan, por edhe për hendbollin kosovar në përgjithësi, do të kujtohet gjithnjë. Klubi Besa Famgas, Peja si qytet, komuniteti i hendbollit pejan dhe kosovar në përgjithësi, sot kanë mbetur pa një lojtar që me paraqitjet e tij ishte shembull për të tjerët. U shprehim ngushëllimet më të sinqerta në emër të gjithë familjes së hendbollit kosovar”, ka shkruar Saraçini.
https://www.facebook.com/besafamgas/posts/5436882226341360
/Tëvë1/
