Një gjë e bukur ka ndodhur sot në Prekazin historik. Në vendlindjen e komandantit legjendar Adem Jashari ka ardhur pajtimi mes Shvercerave dhe Ballistëve, dy tifogrupeve shqiptare që mbështesin Shkupin dhe Shkëndijën, dy skuadrat më të forta në futbollin e Maqedonisë së Veriut.
Një ngjarje e turpshme u regjistrua më 9 nëntor gjatë duelit Shkupi-Shkëndija, i vlefshëm për çerekfinalet e Kupës së Maqedonisë. Kuqezinjtë nga Tetova u sulmuan nga disa anëtarë të Shvercerave pasi kaluan në avantazh në minutën e nëntë. Ndeshja u ndërpre, në fushë zbarkuan forcat speciale, Shkëndija u kualifikua pas fitores 0-3 në tavolinë, teksa kjo ndeshja u shoqërua nga kritikat dhe debate të shumta në rrjetet sociale.
Hoxha dhe bamirësi i njohur, Halil Kastrati ka qenë ndërmjetësi i pajtimit të dy ndër tifogrupeve më të zjarrta shqiptare, teksa është zgjedhur Prekazi legjendar i Jasharajve për takimin mes drejtuesve të Shvercerave dhe Ballistëve.
“Mision vëllazëror! Para një jave ishim në Shkup me përfaqësuesit e dy tifo grupeve, Shvercerat e Shkupit dhe Ballistët e Tetovës.
Tani gjindemi në Prekazin Legjendar, këtu do jepet Besa dhe do të shtrihet dora e pajtimit ashtu siç e do Zoti dhe tradita jonë Shqiptare. Gjithmonë qofshim faqebardhe!”, shkruan Kastrati në rrjetet sociale.
