Leart Paqarada sezonin e ri 2023/24 do ta zhvillojë në një skuadër të re. Mbrojtësi i majtë ka arritur marrëveshje me FC Koln e cila bën pjesë në Bundesligë.
28-vjeçari është ende nën kontratë me St.Pauli, derisa në skuadrën e re do të transferohet në verë, dhe ka firmosur një kontratë deri në qershorin e 2026-ës.
Paqarada këtë sezon ka bërë 15 paraqitje në Bundesligën e dytë. Ai shënoi një gol dhe asistoi në katër të tjerë. Learti është shprehur i lumtur me arritjen e marrëveshjes me Koln, dhe mezi po pret të nisë aventurën e tij të re, por njëherë duhet të përfundojë sezonin me St. Paulin.
“Jam jashtëzakonisht krenar që vesh fanellën e FC Koln nga sezoni i ardhshëm. Një qytet i tërë që e jeton dhe e do këtë klub me plot emocion. Rikthimi në qytetin ku jam rritur dhe që ka qenë gjithmonë shtëpi për mua është një ndjenjë e papërshkrueshme për mua. Mezi pres të rikthehem. Por deri atëherë, fokusi im i plotë do të jetë te FC St. Pauli, të cilit i detyrohem shumë dhe me të cilin dua të kujtohem gjithmonë pozitivisht”, është shprehur Paqarada.
Kjo lëvizje pritet të ndryshoj edhe situatën e Paqaradës te Kosova, i cili pritet të jetë edhe opsioni i parë në formacionin startues te Alain Giresse. /Tëvë1/
