FC Drita përmes një komunikate të lëshuar të martën mbrëma, ka paraqitur vërejtje të shumta në Draft Statutin e Federatës së Futbollit te Kosovës, për të cilin do të votohet në Kuvendin e Jashtëzakonshëm të FFK-së të premtën. Komunikata e lëshuar nga klubi gjilanas është e aksionarëve të skuadrës, Valon Murseli e Flamur Bunjaku.
Te Drita e kanë vlerësuar se i gjithë procesi ka shkelje serioze të proceduarave statutare dhe ligjore, dhe klubi gjilanas u ka bërë thirrje një ashtu edhe delegatëve të FFK-së që të jenë me mend në kokë se çfarë do të votojnë. Federata e Futbollit te Kosovës nuk është pajisur ende me licencë nga MKRS-ja, dhe njëra prej kërkesave që duhet ta përmbushin është ndryshimi në statut, dhe për këtë arsyeje është thirrur edhe Kuvendi i Jashtëzakonshëm nga vetë KE i FFK-së.
Klubi gjilanas pretendon se Draftstatuti është në kundërshtim të plotë me Statutin aktual dhe se ai nuk është dorëzuar me kohë te delegatët për shqyrtim.
“Ky Draft Statut nuk i përmbush kriteret e kërkuara nga MKRS-ja. Përkundrazi vetëm sa thellon edhe më shumë shkeljet ligjore, mospërmbushjet e rekomandimeve të kërkuara nga MKRS-ja”, ka shkruar Drita, që më pas ka rreshtuar edhe nëntë vërejtje të tjera në dokumentin e propozuar nga FFK-ja.
Sipas komunikatës, ka kundërthënie mes neneve; nuk është përfshirë përfaqësimi i lojtarëve në Kuvend; dokumenti bie ndesh me parimet juridike për kuorum; Draftstatuti pamundëson emrat e lavdishëm të futbollit të kandidojnë për pozita në FFK nëse nuk janë të angazhuar në federatë në pesë vjetët e fundit; është në kundërshtim me Statutin e UEFA-s dhe FIFA-s; është në kundërshtim me rekomandimet e MKRS-së…
“Të nderuar sportdashës, juristët e angazhuar nga FC Drita kanë përgatitur propozim amendamentet në Draft Statutin e FFK-së, por federata ka pamundësuar afatet statutare për të dorëzuar këto amendamente. Ftojmë të gjitha klubet që të konsultohen me juristë dhe të japin vërejtjet e tyre rreth Draftstatutit dhe të respektojmë çdo rekomandim të MKRS-së”, shkruan në komunikatën e Dritës.
