Brighton ka refuzuar të premten e kaluar 69 milionë euro nga Arsenali për Moisés Caicedon. Mesfushori qendror ekuadorian (21-vjeçar) ka qenë një nga pikat kryesore të skuadrës së Roberto de Zerbit, duke shënuar një gol dhe dhënë një asistim në 21 ndeshje këtë sezon.
Ai pëlqehet shumë nga Mikel Arteta për të forcuar skuadrën në një moment shumë të rëndësishëm për “Topçinjtë”, që kanë pasur një ecuri të pabesueshme gjatë fazës së parë të kampionatit.
Caicedo u bë pjesë e Brightonit nga Independiente del Valle në vitin 2021 për vetëm pesë milionë euro dhe “Pulëbardhat” duan një shifër që është pranë 100 milionë euro për lojtarin.Gjithsesi, vendimtare do të jetë edhe dëshira e vete lojtarit që duket se po ushtron presion për kalimin te “Topçinjtë”.
“I jam shumë mirënjohës Brightonit që më dha mundësinë të luaj në Premier League dhe ndiej se gjithmonë kam dhënë më të mirën për ekipin. Luaj gjithmonë me një buzëqeshje në fytyrë dhe me gjithë zemër. Jam më i vogli nga 10 fëmijë nga një lagje e varfër në San Domingo, Ekuador, dhe jam krenar që mund të thyejë rekordin si lojtari që është shitur më shtrenjtë nga Brighton dhe t’i mundësoj klubit të investojë në mënyrë që skuadra të vazhdojë në rrugën e saj të suksesshme. Shpresoj gjithashtu që fansat të kuptojnë pse dua ta shfrytëzoj këtë mundësi të madhe”, lexohet në një postim të ekuadorianit.
