Sulmuesi Veton Berisha është kthyer prapë në futbollin norvegjez. Berisha, këtë të martë është prezantuar te Molde, ekip që sezonin e shkuar e fitoi titullin e kampionit të Norvegjisë.
Berisha te Molde është transferuar nga Hammarby, dhe me ekipin e ri ka firmosur kontratë deri në fund të vitit 2026. 28-vjeçari, Berisha është shprehur i lumtur se do të mbartë fanellën e skuadrës kampione, dhe mezi pret të nis aventurën e tij të re.
“Është mirë të jesh këtu. Është një sfidë e mrekullueshme dhe e madhe për mua për të qenë pjesë e një ekipi të madh në Norvegji, i cili është edhe kampion në fuqi i kupës dhe ligës. Mezi po pres fillimin e sezonit të ri dhe ta ndihmoj ekipin”, ka thënë Berisha.
Berisha në verën e vitit të shkuar iu bashkua Hammarbyt nga Vikingu, ndërsa në kampionatin suedez shënoi katër gola në 14 paraqitje sezonin e shkuar. Ai ka edhe dhjetë ndeshje me Përfaqësuesen e Norvegjisë dhe një gol të shënuar.
