Ish-ministrja e Jashtme e Shqipërisë, Elisa Spiropali ka reaguar lidhur me protestën e studentëve për gjuhën shqipe në Maqedoninë e Veriut, duke e cilësuar këtë çështje si thelbësore dhe të panegociueshme.
Përmes një reagimi në rrjetet sociale, ajo ka theksuar se gjuha shqipe përbën një të drejtë themelore që nuk duhet të vihet në diskutim apo të trajtohet si kompromis.
“Një vijë e hollë e ndan dinjitetin nga heshtja. Të protestosh sot për gjuhën shqipe nuk është vetëm alarm, por një sinjal që diçka thelbësore nuk po funksionon siç duhet”, është shprehur Spiropali.
Ajo ka nënvizuar se kur të drejtat e garantuara me Kushtetutë dhe ligj kërkohen përmes protestës, kjo tregon për nevojën e reflektimit dhe përmirësimit të zbatimit të tyre në praktikë.
Sipas saj, gjuha shqipe nuk është çështje interpretimi institucional, por një e drejtë bazike që duhet të respektohet dhe të zbatohet në përditshmëri.
Spiropali e ka cilësuar protestën e studentëve si një thirrje për forcimin e standardeve demokratike dhe garantimin e të drejtave themelore, duke shtuar se një shtet që respekton gjuhën forcon barazinë dhe besimin qytetar.
Në fund, ajo ka shprehur mbështetje për studentët, duke theksuar se kjo nuk është vetëm një çështje e shqiptarëve, por një provë për funksionimin e shtetit dhe respektimin e parimeve demokratike, veçanërisht për dy vendet mike, Shqipërinë dhe Maqedoninë e Veriut, që ndajnë aspirata të përbashkëta evropiane.
Ndryshe, studentët shqiptarë në Maqedoninë e Veriut do të protestojnë të hënën në Shkup për të drejtën e provimit në gjuhën shqipe.
