Edhe gjatë së enjtes Gjykata Speciale vazhdoi me bastisje.
Cak kësaj rradhe ishte shtëpia e ish kryetarit të Malisheves, Isni Kilajt.
Në shtëpinë e Kilajt në Lubizhd të Malishevës qysh në orët e hershme të mëngjesit EULEX-i nisi bastisjet.
Dy vetura të EULEX-it dhe një e Policisë së Kosovës po monitoronin edhe jashtë oborrit të shtëpisë, ndërsa një tjetër veturë e EULEX-it e cila po qëndronte brenda oborrit u largua rreth orës tre e gjysmë.
Ndërkohë Fatmir Kilaj, vëllau i ish kryetarit, Isni Kilaj tha se fillimisht u informua nga vet vëllai i cili gjatë bisedës në telefon i kishte thënë të mos shkonin në shtëpi meqë ka filluar bastisja.
Përveç shtëpisë në fshat, Kilaj thotë se bastisje u kry edhe tek shtëpia që ish-kryetari e ka në Prishtinë.
Ndërkohë për këtë bastisje reagime pati edhe nga OVL- UÇK-së në Malishevë.
Kryetari Metush Kryeziu, njëherësh ish-luftëtar përmes një një statusi në rrjetin social në Facebook tha se është i indinjuar me akte të tilla.
“Në vazhdën e këtyre bastisjeve, pjesëtarë të EULEXIT në mëngjesin e sotëm vazhduan me bastisjen e shtëpisë të komandantit Isni Kilaj. Çka po ndodhë? Pse po targetohet një grup i njerëzve dhe ai grup i cili është i afërt me Thaçin? Tashmë kjo gjykatë në mungesë të fakteve po bënë spektakël. Turp!”, thotë Kryeziu.
Isni Kilaj, nga Gjykata Speciale ishte ftuar edhe në vitin 2019 për intervistim.
E bastisje ditëve të fundit janë kryer edhe tek shtëpitë e ish-këshilltarëve të Hashim Thaçit, tek banesa e Blerim Shales, Artan Behramit, Ismajl Sylës, Bashkim Smakajt, ky i fundit ishte edhe shef i AKI-së.
