Spanja dhe Jordania kanë nënshkruar të enjten një deklaratë të përbashkët mbi Partneritetin Strategjik, ndërsa Mbreti jordanez Abdullah II vizitoi Madridin.
Kryeministri spanjoll, Pedro Sanchez dhe Abdullah nënshkruan deklaratën që do të forcojë lidhjet politike, ekonomike, sociale, kulturore, të bashkëpunimit dhe të mbrojtjes midis dy vendeve, sipas një deklarate të qeverisë spanjolle.
“Ky është niveli më i lartë i marrëdhënieve që dy shtete mund të mbajnë me njëri-tjetrin dhe marrëveshja e parë e këtij lloji që Jordania ka arritur me një vend perëndimor”, thuhet në deklaratë.
Të dy vendet ranë gjithashtu dakord për krijimin e një traktati ekstradimi që do të përcaktonte një kornizë ligjore për dorëzimin reciprok të individëve të kërkuar për krime të mbuluara nga të dy sistemet ligjore, ka raportuar agjencia Anadoly.
Ata gjithashtu nënshkruan një memorandum mirëkuptimi (MM) mbi bujqësinë për të mundësuar bashkëpunimin dypalësh me shkëmbimin e njohurive dhe përvojave teknike dhe legjislative.
Kryeministri spanjoll dhe mbreti i Jordanisë folën gjithashtu për “dhunën” e vazhdueshme në Gaza dhe diskutuan për konferencën ndërkombëtare të organizuar nga OKB-ja në Nju Jork, ku dy vendet do të bashkë-kryesojnë një nga grupet e punës, “që synojnë krijimin e një shteti palestinez”.
Deklarata vuri në dukje se Sanchez e informoi Abdullahun për progresin e bërë në projektrezolutën që po promovon me Palestinën para Asamblesë së Përgjithshme të OKB-së, e cila do të “kërkojë që Izraeli t’i japë fund bllokadës humanitare të vendosur në territor dhe të lejojë akses të plotë dhe të pakufizuar për ndihmë humanitare”.
Gjithashtu shtoi se kryeministri përmendi edhe shqyrtimin e vazhdueshëm të Marrëveshjes së Asociimit me Izraelin nga BE-ja, “duke marrë parasysh se ajo shkel Nenin 2 të Konventës për të Drejtat e Njeriut”.
