Dy prej kombëtareve më të mëdha të Evropës, Spanja dhe Franca, përballen sot në mbrëmje në gjysmëfinalen e parë të Kampionatit Evropian “Gjermania 2024”.
Kjo ndeshje nis në orën 21:00 dhe zhvillohet në stadiumin “Allianz Arena” të Munchenit. Në këtë gjysmëfinale, përplasen kombëtaret që para fillimit të “Euro 2024” vlerësoheshin favorite për të triumfuar dhe kjo ndeshje më të drejtë është vlerësuar si finale para finales.
Spanja është kombëtarja më efikase në Evropian, ndërsa Franca ka shënuar më së paku gola, saktësisht një dhe atë nga penalltia duke mos llogaritur autogolat e kundërshtarëve.
Pra, në total Franca i ka shënuar tre gola deri më tani në Evropian kurse Spanja hiq më pak se 11-të, por të dyja kombëtaret kanë pranuar vetëm nga tre gola.
Si Spanja ashtu edhe Franca ndeshjet çerekfinale i kaluan me shumë vështirësi. Spanja eliminoi Gjermaninë pas vazhdimeve, ndërsa Franca ishte më e mirë se Portugalia pas penalltive. Spanja ka pasur bilanc të përkryer në Gjermani, ku po e kërkon titullin e katërt që do të ishte rekord.
Është kombëtarja e vetme që i ka fituar të gjitha ndeshjet në grup kurse Franca barazoi me Poloninë dhe Holandën, pas fitores së vështirë ndaj Austrisë. Krahas Pedrit tashmë të lënduar, Spanja ndaj Francës do të jetë pa mbrojtësit Dani Carvajal e Robin Le Normand që janë të suspenduar.
Këto dy kombëtare janë takuar 36 herë, me Spanjën që i ka 16 fitore kurse Franca 13-të por që i ka fituar 5 prej tetë ndeshjeve të fundit. Spanja për herë të gjashtë paraqitet në gjysmëfinale dhe në katër raste ka avancuar në finale, ndërsa Franca ka luajtur pesë herë në këtë fazë dhe vetëm tri herë ka fituar.
Fituesi i ndeshjes Spanjë – Francë, do të përballet në finale me fituesin e gjysmëfinales tjetër Holandë – Angli në finale e madhe të “Euro 2024” që do të luhet të dielën mbrëma në Berlin.