Profesori universitar, Nexhmedin Spahiu ka thënë se nuk është i habitur me propozimin e Lëvizjes Vetëvendosje që Glauk Konjufca të jetë mandatar për kryeministër të Kosovës, pasi sipas tij kjo është pjesë e një strategjie politike të kryeministrit në detyrë, Albin Kurti.
Në emisionin “Info Nata” në Tëvë1, Spahiu ka theksuar se Kurti po e manovron situatën në mënyrë që ose të sigurojë votimin e qeverisë së pakicës, ose vendi të shkojë në zgjedhje në fund të dhjetorit.
“Nuk ishte befasi, sepse tash Albin Kurti e ka bërë ashtu që ose do t’ia votojnë qeverinë e pakicës, ose zgjedhjet do t’i mbajë më 28 dhjetor, datë që i konvenon atij. Arsyeja është se diaspora në atë kohë ndodhet në Kosovë dhe ai mund të nxjerrë maksimumin e votave në dispozicion. Tash mbetet të shihet si do të rrjedhin gjërat, por gjithsesi kjo është një datë shumë e përshtatshme për të. Duke propozuar kandidatin e dytë dhe duke e shtyrë procesin edhe për 15 ditë të tjera, ai praktikisht po e cakton datën e zgjedhjeve më 28 dhjetor, që është një datë që i leverdis atij”, ka thënë Spahiu.
I pyetur nëse propozimi i Glauk Konjufcës për mandatar për kryeministër ishte një lloj kompromisi nga ana e Lëvizjes Vetëvendosje, Spahiu është shprehur se po, por me prapavijë politike të qartë.
“Është një lloj kompromisi, sepse thotë: ‘Nuk po e dëshironi të parin, ja ku e keni të dytin më të votuar. Nuk po e dëshironi as atë?’ dhe në fund del me parullën ‘na jepni 50% të votave, sepse ndryshe nuk mund ta bëjmë qeverinë se nëse opozita e merr pushtetin, ajo do ta kthejë në pikën zero punën në veri,’ dhe kështu kjo fushatë po i shkon më për shtat Kurtit sesa vetë njerëzve të tij”, ka deklaruar Spahiu.
