Analisti politik Nexhmedin Spahiu ka komentuar zhvillimet e fundit politike në vend, përfshirë mundësinë e formimit të një qeverie të re dhe koalicioneve të mundshme.
I ftuar në emisionin “Info Nata” në Tëvë1, Spahiu ka shprehur skepticizëm për një bashkëqeverisje mes Lëvizjes Vetëvendosje dhe Partisë Demokratike të Kosovës.
“Për një koalicion mes PDK-së dhe LVV-së, unë mendoj që PDK-së i konvenon çfarëdo marrëveshje qoftë të marrë kryeministrin, qoftë jo. Kjo është sikur ajo forja te logjikonomia ku ai aktori që thoshte: ‘me fut krahun pak në sofër, aty prej sofra bëhet e jotja’. Mjafton me marrë 1/3 e qeverisë, dhe e merr gjithë qeverinë në dorë PDK-ja, sepse është një parti më energjike dhe më dinamike,” tha Spahiu.
Megjithatë, ai shtoi se një marrëveshje e tillë do të kishte pasoja të rënda politike për Vetëvendosjen.
“Problemi është se nëse do të ndodhte një koalicion i tillë, do të ishte vetëvrasje politike për LVV. Vetëvendosja është në një udhëkryq: ose duhet të sakrifikojë dhe të krijojë një qeveri të brishtë me Nismën dhe ndonjë parti tjetër, ose të ballafaqohet me dorëzimin e pushtetit. Të bëjë koalicion me PDK-në është më keq sesa të dorëzojë pushtetin,” theksoi ai.
