Profesori i shkencave politike, Nexhmedin Spahiu, ka deklaruar se asnjë deputet që e ka votuar krijimin e Gjykatës Speciale nuk ka të drejtë morale të dalë dhe të protestojë kundër saj, duke theksuar se përgjegjësia për funksionimin e saj bie mbi ata që e mundësuan krijimin e saj.
Në emisionin “Këndi i Debatit” në Tëvë1, Spahiu ka thënë se qytetarët kanë të drejtë të protestojnë ndaj çdo institucioni që mendojnë se nuk po funksionon si duhet, përfshirë edhe Gjykatën Speciale në Hagë.
Megjithatë, sipas tij, kjo e drejtë nuk vlen për ata që e kanë votuar vetë themelimin e saj.
“Është e drejtë e qytetarëve të protestojnë për gjithçka që nuk u duket në rregull ndaj çdo institucioni të shtetit të Kosovës, në këtë rast edhe ndaj Gjykatës Speciale në Hagë. Qytetarët kanë të drejtë. Por absurditeti më i madh është pjesëmarrja e presidentes së Kosovës në protestë, sepse kreu i shtetit po proteston kundër një institucioni të vetë shtetit. Ne si qytetarë kemi të drejtë, por jo ai apo ajo që është në krye të shtetit, sidomos kur vetë e ka votuar atë si deputete. Mendoj se jo vetëm ajo, por të gjithë ata që e kanë votuar Gjykatën Speciale nuk kanë të drejtë morale të dalin dhe të protestojnë. Ata thonë se po protestojnë për devijim të procesit, por pse e kanë lejuar të devijojë? Sepse vetë e kanë mundësuar. Kanë menduar diçka tjetër kur e kanë nënshkruar, nuk e kanë lexuar mirë tekstin dhe tani ka dalë diçka tjetër. Askush nuk ua ka fajin për injorancën e tyre”, është shprehur ai.
Sipas Spahiut, një deputet që e ka votuar Gjykatën Speciale mund të protestojë kundër saj vetëm nëse kërkon falje publike, pranon gabimin dhe jep dorëheqje nga të gjitha funksionet publike.
