Sot e (enjte) do mbahet vazhdimi i seancës konstituive të Kuvendit të Kosovës, i ndërprerë të martën, pas dështimit të miratimit të raportit për vlerësimin e mandatit të deputetëve.
Seanca nga kryesuesi, Avni Dehari është thirr për të enjten në orën 12:00, pas marrjes së përgjigjes nga presidentja Osmani, prej së cilës kishte kërkuar interpretim se si duhet të veprohet, pas asaj që ndodhi të martën.
Në letrën drejtuar kryesuesit Dehari, Osmani ka potencuar se Kushtetuta e Republikës dhe praktika gjyqësore e Gjykatës Kushtetuese kërkojnë interpretim që e mundëson, e jo që e pengon, themelimin dhe funksionimin kushtetues të institucioneve.
Çfarë mund të ndodhë në seancë
Partia që aktualisht udhëheq qeverinë në detyrë, Lëvizja Vetëvendosje shprehet e bindur se i ka numrat për seancën konstituive, ku po përballet me kundërshtimet e partive opozitare të legjislaturës së 8-të, se anëtarët e qeverisë që janë zgjedhur deputet duhet të japin dorëheqje.
Donika Gërvalla, ministre në detyrë e Punëve të Jashtme ka thënë në Tëvë 1 se të martën i kishin votat, por sipas saj, opozita nuk lejoi të kalohet në pikën e zgjedhjes së kryetarit të Kuvendit.
Ajo ka thënë se si kabinet qeveritarë kanë dorëzuar dorëheqjen dhe tani janë në duke ushtruar detyrën, por ka theksuar se institucionet nuk mund të lihen pa përgjegjës.
Akuza ndaj opozitës ka ka pasur të mërkurën edhe kryeministri në detyrë, Albin Kurti, që sipas tij bllokuan konstituimin e Kuvendit, duke përmendur shembuj të ish-kryeministrave të kaluar se kanë mbajtur funksionin e kryeministrit në detyrë, deri në zgjedhjen e kryeministrit të ri.
Por, as partitë opozitare nuk kanë dhënë sinjale se kanë ndryshuar qëndrim, sa i përket kërkesës për dorëheqje nga Kurti dhe ministrat tjerë të zgjedhur deputet.
Kryetari i LDK-së, Lumir Abdixhiku të mërkurën tha se në seancë do të kërkojnë sërish dorëheqjen e kabinetit qeveritarë.
As nga PDK e AAK nuk kanë shprehur qëndrime ndryshe nga ato që kishin të martën.
