Gjatë ditës së enjte (sot) pritet të mbahet seancë e jashtëzakonshme e Këshillit të Sigurimit të OKB-së, e thirrur nga presidenti serb Aleksandar Vuçiq dhe nga drejtori i Zyrës për Kosovë, Petar Petkoviq, ku temë diskutimi do të jetë gjendja në Kosovë.
Së fundmi në një intervistë për mediat serbe, ministri i Punëve të Jashtme të Serbisë, Ivica Daçiq, tha se vendimi i Bankës Qendrore të Kosovës për heqjen e dinarit është një nga vendimet të cilat synojnë t’i detyrojnë serbët të vendosin të largohen të qetë nga Kosova.
Një ditë më parë, mediet serbe raportuan se Ivica Daçiq ka kërkuar që seanca të jetë e hapur.
“Ekziston një argument i tërë se çfarë ka ndodhur, çfarë po dhunohet, çfarë terrori po bëhet ndaj serbëve dhe cili është qëllimi përfundimtar, që është dëbimi i serbëve nga Kosova, pra që ata të vendosin vetë se të largohen të qetë”, tha shefi i diplomacisë serbe.
Tutje, Daçiq tha se është turp për bashkësinë ndërkombëtare që pas 11 vitesh ta ftojë Prishtinën që të formojë Asociacionin e Komunave me shumicë serbe.
