Nga ora 14:00 e ditës së sotme do të fillojë “Marshi për Drejtësi” , i cili është organizuar nga iniciativa “Liria ka emër”.
Në kuadër të këtij marshi, përveç pjesëmarrësve të personaliteteve të rëndësishme, përmes një njoftimi për media është bërë e ditur se do të ketë edhe fjalime.
Marshi do të realizohet te bina, e cila është vendosur në sheshin “Skënderbeu”.
“Nesër, nga ora 14:00, do të mblidhemi të gjithë në sheshin “Zahir Pajaziti” në Prishtinë, për të marshuar drejt sheshit “Skënderbeu”. Në kuadër të Marshit për Drejtësi, janë organizuar edhe fjalime të pjesmarrësve të ndryshëm. Bina është vendosur te sheshi “Skënderbeu”, ku edhe do të mbahen fjalimet”, thuhet në njoftimin për media.
Marshi ka për qëllim mbështetjen e luftës së drejtë të Ushtrisë Çlirimtare të Kosovës, dhe ish-krerëve të saj, Hashim Thaçi, Kadri Veseli, Jakup Krasniqi, Rexhep Selimi dhe bashkëluftëtarët e tyre në Hagë.
Marshi është përkrahur nga shumë qytetarë, nga partitë në pozitë e opozitë, nga Bashkësia Islame e Kosovës, si dhe nga ish-shefi i Misionit të OSBE-së në Kosovë, William Walker. /teve1.info/