Prishtina – Dukagjini dhe Malisheva – Gjilani, janë dy ndeshjet tjera që do të luhen gjatë ditës së sotme në kuadër të xhiros së 24-t të Superligës së Kosovës.
Dueli i parë, do të jetë ai ndërmjet Prishtinës dhe Dukagjinit, i cili nis në orën 12:30 dhe luhet në Kampin Nacional të FFK-së, në Hajvali.
Prishtina ende nuk di për fitore në pranverë, ku në pesë ndeshje të luajtura deri më tani ka regjistruar katër barazime dhe një humbje.
Renditet e gjashta në tabelë me 31 pikë, tri më shumë se Dukagjini që është i shtati dhe në këtë ndeshje futet pas fitores ndaj Malishevës vikendin e shkuar.
Ndërkohë, prej orës 14:00 do të luhet ndeshja ndërmjet Malishevës dhe Gjilanit, me skuadrën vendase që është e treta në tabelë me 37 pikë, tri më shumë se Gjilani që renditet i katërti në tabelë.
Gjilani është në formë fantastike, ku në pesë ndeshjet e fundit ka katër fitore e një barazim.
