Dita e mësuesit është një festë e cila i kushtohet mësimdhënësve, në shkolla dhe universitete.
Shtatë marsi e ka zanafillën e hershme, që kujton themelet e para të shkollës shqipe – në fakt ka filluar të kujtohet që kur shteti shqiptar vendosi që kjo ditë të jetë festë në shenjë përkujtimi të themelimit të të parës Mësonjëtore shqipe, në Korçë.
Mësonjëtorja e parë shqipe në Korçë u themelua më 7 mars 1887.
Festa e mësuesit në rrafshin kombëtar shërben për t’i vlerësuar traditat më të mira të shkollës shqipe, pa dyshim edhe figurën e nderuar të mësuesit, por edhe të gjithë punonjëseve të arsimit, si edukatorë të brezit të ri dhe si kontribuues të zhvillimit dhe përparimit të shoqërisë shqiptare.
Kjo ditë shënohet tradicionalisht edhe në Kosovë, me aktivitete të ndryshme.
Në Prishtinë, për shembull, sot do të ndahen mirënjohje për disa mësimdhënës të dalluar, si dhe do të ketë vizitë në shkollën “Mehmet Gjevori”, e cila mban emrin e pedagogut nga Shqipëria që në vitet ’40-të iu bashkua përpjekjeve për arsimimin e gjeneratave në Kosovë.
Gjatë ditës, KP do të sjellë disa rrëfime të mësimdhënësve që nuk ndalën përpjekjet për arsimim gjatë luftës së viteve 1998-1999.
