Në rrethanat aktuale politike, dialogu nuk përbën prioritetin kryesor për Kosovën dhe Serbinë.
Mirëpo kjo çështje ështtë top prioritet për ndërmjetësin special të dialogut, Peter Sorensen, i cili erdhi në Prishtinë më qëllimin për ta shtyrë përpara këtë proces.
Emisari i BE-së, fillimisht zhvilloi takim me presidentin e vendit, Vjosa Osmanin.
Kjo e fundit në bisedat që zhvilloi me diplomatin danez i ngriti disa shqetësime duke theksuar që procesi i negociataveduhet të jetë i paanshëm.
“Në kuadër të diskutimit, u trajtua edhe procesi i konstituimit të Kuvendit dhe institucioneve të tjera, si dhe rëndësia që këto institucione të funksionojnë në mënyrë demokratike për të avancuar objektivat e përbashkëta. Presidentja trajtoi edhe çështjen e arrestimeve arbitrare të qytetarëve të Kosovës nga ana e Serbisë duke kërkuar angazhim të bashkësisë ndërkombëtare në mënyrë që Serbia t’i ndalë këto veprime të paligjshme ndaj qytetarëve të Kosovës”, thuhet nga Presidenca.
Pas takimit me Osmanin, Sorensen shkoi tek kryeministri në detyrë, Albin Kurti, i cili mbërriti në zyrë disa minuta me vonesë.
Takimi ishte goxha i gjatë por Sorensen ishte fjalëpakë kur doli para gazetarëve.
“Sapo pata takim me kryeministrin Kurti dhe presidenten Vjosa Osmani, jam këtu për shkak të mandatit tim, për të diskutuar se si ta implementojmë Marrëveshjen e Ohrit, sepse situata politike këtu nënkupton që gjërat mund të marrin më shumë kohë. Kështu që ky është një takim i rregullt. Jam i lumtur që jam këtu”, tha emisari i BE-së para gazetarëve.
Megjithatë, Sorensen tha se dialogu është akoma gjallë.
“Dialogu është i gjallë dhe aktiv”, tha ai.
Më shumë detaje për takimin dha kryeministri në detyrë, Albin Kurti.
“Prej më shumë se dy vjetësh, shqiptarët dhe serbët punojnë bashkë në katër komunat veriore, pa asnjë incident. Kërkova që të ketë më shumë mirënjohje për Kosovën për këtë realitet” , u shpreh Kurti.
Që nga shtatori i vitit 2023, nuk ka pasur takim të nivelit të lartë mes Albin Kurtit dhe presidentit serb, Aleksandar Vuçiq.
