Përfaqësuesi i Organizatës së Veteranëve të Luftës së UÇK-së, Fatmir Sopi, ka reaguar ndaj vendimit të Qeverisë në detyrë për të rritur pensionet dhe shtesat për kategori të ndryshme shoqërore, duke lënë jashtë përfitimeve veteranët e luftës.
Në emisionin “Info Nata” në Tëvë1, Sopi tha se ekzekutivi po e trajton me padrejtësi kategorinë e veteranëve dhe kërkoi që paga e tyre të jetë të paktën e barabartë me pagën minimale.
“Kërkesat tona janë që të paktën që ky ligj të rikthehet aty ku ka qenë, që paga e veteranit të paktën të jetë e barabartë me pagën minimale. Qeveria e Kosovës sot ka fol për të gjitha kategoritë e shoqërisë, mirëpo për veteranët, sikur e ka një inat dhe nuk ka dashur që as t’i përmend”, deklaroi ai.
Ai tha se nuk është hera e parë që veteranët anashkalohen në politikat sociale të qeverisë.
“Nuk është hera e parë që Qeveria e Kosovës i anashkalon kategoritë e dala nga lufta. Edhe me ligjin paraprak, kjo qeveri nuk e ka lejuar që paga e veteranit të jetë ekuivalente me pagën minimale. Siç duket, ka inat, sepse e vetmja kategori që nuk u përmend ishin kategoritë e dala nga lufta,” shtoi ai.
Reagimi i Sopit vjen pas vendimit të Qeverisë në detyrë për miratimin e buxhetit të vitit 2026, me vlerë rreth 4 miliardë euro. Krahas buxhetit, ekzekutivi miratoi edhe rritjen e pensioneve bazë nga 120 në 150 euro dhe shtesave për fëmijë me 50 për qind.
Megjithatë, veteranët e Ushtrisë Çlirimtare të Kosovës nuk janë përfshirë në këto rritje, çka ka nxitur reagime nga OVL e UÇK-së. /teve1.info/
