Përfaqësuesi i Organizatës së Veteranëve të Luftës së UÇK-së, Fatmir Sopa, ka reaguar ndaj funksionimit të Gjykatës Speciale, duke theksuar se ajo ka devijuar nga qëllimi fillestar për të cilin ishte themeluar.
Në prag të protestës që do të mbahet sot në sheshin “Skënderbeu” në Prishtinë, Sopa deklaroi se themelimi i kësaj gjykate ishte rezultat i një presioni të jashtëzakonshëm ndërkombëtar mbi institucionet e Kosovës, përfshirë Kuvendin.
“Ne e dimë se është formuar Gjykata me një presion të jashtëzakonshëm ndërkombëtar mbi Parlamentin dhe mbi të gjitha institucionet. Por, asokohe krerët institucionalë nuk iu kanë frikësuar asnjë gjykate, sepse UÇK-ja ka bërë një luftë të drejtë dhe çlirimtare”, u shpreh ai në emisionin “Mesditë” në Tëvë1.
Sipas tij, vetë ata që e mbështetën formimin e saj sot po përballen me akuzat dhe proceset e saj, gjë që e bën këtë realitet edhe më të padrejtë.
Sopa gjithashtu kritikoi faktin që hetimet për trafikim organesh janë pushuar, duke theksuar se kjo e bën të pakuptimtë vazhdimin e misionit të kësaj gjykate.
“Gjykata Speciale është e dëmshme dhe po rezulton se ka devijuar nga rruga e saj për çfarë është themeluar. Me pushimin e hetimeve për trafikim organesh, kjo Gjykatë nuk do të duhej të vazhdonte misionin e saj”, tha ai.
Protesta e sotme është thirrur nga OVL-UÇK dhe është mbështetur edhe nga subjekte opozitare, me qëllim për të shprehur pakënaqësinë ndaj gjykimit të ish-krerëve të UÇK-së që ndodhen në paraburgim në Hagë.
Tubimi pritet të fillojë në orën 17:00 në sheshin kryesor të Prishtinës dhe pritet pjesëmarrje masive nga qytetarët./teve1.info/
