Sonte nga ora 20:30, në rrugën “Haradin Bajrami” në Lipjan do të mbahet një ndezje simbolike e qirinjve në kujtim të Agon Zejnullahut, i cili humbi jetën në orët e hershme të së hënës në rrethana ende të paqarta, gjatë një përballjeje me Policinë e Kosovës.
Aktiviteti është organizuar nga rrjeti i organizatave joqeveritare “Avonet”, i cili ka ftuar qytetarët, përfaqësues të institucioneve, deputetë dhe organizata të shoqërisë civile që t’i bashkohen kësaj ngjarjeje përkujtimore.
“Ky tubim është përkujtim, është kërkesë për drejtësi, për reflektim institucional dhe për përgjegjësi ndaj jetës së njeriut”, thuhet në thirrjen publike të organizatorëve.
Avonet thekson se ndezja e qirinjve ka për qëllim t’i japë zë kujtimit të Agonit dhe të kundërshtojë heshtjen përballë dhimbjes dhe tragjedive të tilla.
Ngjarja vjen pas vendimit të Gjykatës për të caktuar masën e paraburgimit prej një muaji për pesë pjesëtarë të Policisë së Kosovës, të dyshuar për përfshirje në ndërhyrjen që çoi në vdekjen e 27-vjeçarit.
