Bylbyl Sokoli, është rikthyer në postin e trajnerit te klubi i futbollit Drenica.
Lajmi u bë i ditur zyrtarisht të mërkurën, nga klubi i Skenderajt përmes faqes zyrtare në facebook.
“Bylbyl Sokoli emërohet trajner i Drenicës. Pas ndryshimeve në stafin drejtues, klubi ka arritur marrëveshje me trajnerin e ri që do ta udhëheqë ekipin në pjesën e mbetur të sezonit. Bylbyl Sokoli, trajneri me përvojë të madhe në futbollin kosovar, zyrtarisht është emëruar si kryetrajner i ri i skuadrës. Me një histori të pasur në zhvillimin e futbollit dhe drejtimin e skuadrave të njohura, besojmë se përvoja dhe vizioni i Sokolit do të jenë vendimtare për të ndihmuar klubin të arrijë objektivat e tij”, ka njoftuar klubi lider i Ligës së Parë.
Sokoli ishte shkarkuar nga Drenica pikërisht pasi bëri të ditur garimin për zgjedhjet e 9 shkurtit.
Klubi e zëvendësoi me Arsim Thaqin të cilin e shkarkoi të martën.
E të mërkurën, Sokoli që mori mbi 18 mijë vota, u rikthye në klub.
