Peja nuk ka të ndalur këtë sezon në Superligën e Kosovës në basketboll. Kampionia në fuqi ka regjistruar edhe fitoren e katërt në po aq ndeshje të luajtura deri më tani, pasi në ndeshjen e luajtur në palestrën “13 Qershori” në Suharekë mposhti Yllin me shifrat 95:90.
Skuadra e drejtuar nga trajneri Rami Hadar e nisi furishëm ndeshjen ndaj Yllit. Çerekun e parë e fitoi me shifrat 29:23, ndërsa në pushim shkoi me rezultatin 57:43 pasi periudhën e dytë e mbylli me tri pikë epërsi.
Ylli reflektoi në çerekun e tretë, të cilin e mbylli në favor të vetin 25:15 dhe në dhjetë minutat e fundit të ndeshjes u fut me vetëm katër pikë disavantazh. Megjithatë, Peja arriti ta mbajë epërsinë deri në çerekun e fundit për ta regjistruar fitoren e radhës.
Peja, po ashtu u paraqit pa Lis Shoshin e Arian Qallakun e lënduar. Përderisa Peja shënoi fitoren e katërt, Ylli regjistroi humbjen e tretë dhe triumfin e vetëm deri më tani, e ka kundër Istogut.
Justin Davis me 27 pikë e 10 kërcime ishte më efikasi te Peja, ku me lojë të mirë u dallua edhe John Chandler që ndeshjen e mbylli me 20 pikë, 4 kërcime e 4 asistime.
Tek Ylli, hiq më pak se gjashtë basketbollistë realizuan pikë dyshifrore por që nuk arritën të shmangin humbjen. Jalen Nesbitt me 18 pikë, 6 kërcime e 7 asistime ishte më efikasi, ndërsa Henrik Shirko shtoi 15 pikë.
