Politologu Avci Smajljaj vlerëson se partitë opozitare në Kosovë ende nuk kanë arritur të rifitojnë besimin e qytetarëve, pavarësisht reformave të bëra në listat e tyre.
Smajljaj tha se lista e kandidatëve të opozitës kanë qenë më të mira, krahas asaj të LVV-së.
“Sikur opozita ende s’e ka marrë vetën. Të paktën kanë bërë reforma në listat e tyre, por jo sa për të bindur qytetarin se do të kthehemi aty ku ishim. Në krahasim me listat e LVV-së, mund të them se listat e opozitës kanë qenë më të mira. Edhe pse aty ka pasur emra të diskredituar në të kaluarën, po ashtu siç ka pasur edhe në listën e LVV-së. Reforma ka pasur, ndoshta jo e mjaftueshme. Për këtë arsye, rezultati zgjedhor u thellua dukshëm, madje i papritur edhe për LVV-në”, theksoi Smajljaj në emisionin “Këndi i Debatit” në Tëvë1.
Ai shtoi se vota e qytetarëve, përfshirë edhe atë të mërgimtarëve, është orientuar kryesisht drejt liderëve, duke e quajtur këtë një “votë autoritare”.
“Vota nga brenda shihet se është shkuar për liderin, si ajo edhe e mërgimtarëve, kështu që mund ta quaj si votë autoritare. Nuk e di pse patjetër ne duhet të jetojmë në kohën e liderëve, kur kemi institucione, kemi shtet – duhet të lidhemi për politika, për programe, jo për liderë të caktuar”, deklaroi politologu.
Smajljaj nënvizon nevojën që partitë të fokusohen më shumë te programet dhe politikat, në vend që të varen nga figura individuale, për të fituar besimin e qytetarëve në të ardhmen. /teve1.info/
