Politologu Avdi Smajljaj, ka vlerësuar se kryetari i Lidhjes Demokratike të Kosovës, Lumir Abdixhiku ka bërë disa reforma në parti, por që nuk kanë qenë të mjaftueshme.
Madje, ai ka vlerësuar se qasja e reformës së Abdixhikut në parti duke përjashtuar njerëz që kanë dhënë kontribut në LDK ka qenë e gabuar.
Smajljaj në emisionin “Këndi i Debatit” në Tëvë1 ka thënë kjo reform është fryma që ka krijuar Vetëvendosje në opinion se kushdo që ka qenë në pushtet është i korruptuar.
“Qasja e reformës ka qenë e gabuar. Abdixhiku është përpjekë ta reformojë partinë nga fryma demonizuese që ka krijua Vetëvendosje në opinion se gjithë ata që kanë qenë në pushtet janë të korruptuar dhe është nisë nga kjo dhe ka përjashtuar njerëz që kanë kontribuuar në LDK”, ka thënë ai.
Smajljaj ka përmendur edhe disa procese gjatë reformës së Abdixhikut, që sipas tij nuk kanë qenë të mjaftueshme
“Ka pas zgjedhje me kundërkandidate që partitë tjera s’kanë pas ose kanë pas pak. Megjithatë demokracia nuk ka shku në vend sa duhet, zgjedhjet nuk janë bërë me vota të fshehta, është mbajt Kuvendi Zgjedhor pa u mbajt në nëndegë dhe degë të cilat më pas do të kishin do të dërgonin përfaqësuesit e tyre të ri në Kuvendin Zgjedhor që mund të zgjidhej një lidership”, është shprehur ai.
Brenda LDK-së ka pasur pakënaqësi pas zgjedhjes së Lumir Abdixhikut kryetar i partisë.
E këto pakënaqësi janë shpërfaqur edhe më shumë pas zgjedhjeve të 9 shkurtit. Ish-kryeministri nga kjo parti, Avdullah Hoti ka kërkuar ndryshime në lidershipin e LDK-së.
