Politologu, Avdi Smajljaj ka thënë se nëse Shtetet e Bashkuara të Amerikës i tërheqin trupat nga Evropa mund t’i tërheqin edhe nga Kosova.
Ai ka shtuar se nëse ndodhë kjo atëherë ushtritë e shteteve tjera anëtare deri diku mund ta plotësojnë zbrazëtirën që mund të krijohet mirëpo sipas tij nuk janë të mjaftueshme.
“Tani çështja është cila do të jetë zgjidhja që do të ofrohet në rast se mblidhen fuqitë e mëdha dhe thonë se kjo do të jetë zgjidhja për Kosovën. Sa ne jemi të gatshëm? Nuk po flas në aspektin ushtarak. Uroj që SHBA-ja mos ti tërheqë trupat po në rast se i tërheq nga Evropa mund t’i tërheqë edhe nga Kosova. Ndoshta në afat të shkurtër deri diku ushtritë e shteteve tjera anëtare mund ta plotësojnë atë zbrazëtirën që deri diku mund të krijohet, mirëpo po besoj që nuk janë mjaftueshme”, ka deklaruar Smajlaj në emisionin “Këndi i Debatit” në Tëvë1.
Të mërkurën mediumi prestigjioz gjerman BILD raportoi se sipas informacioneve të tyre shërbimet perëndimore të sigurisë dhe politikanët kanë frikë se negociatat që filluan të martën në Riad mund të çojnë në përfundimin e pranisë së trupave amerikane në pjesë të mëdha të Evropës.
Ndërkaq në një përgjigje për Tëvë1 lidhur me raportimet e mediumit gjerman se trupat amerikane mund të largohen nga Kosova, nga NATO është thënë se SHBA ka bërë të qartë pritshmërinë që Aleatët e NATO-s të bëjnë më shumë, të investojnë më shumë dhe të prodhojnë më shumë në mbështetje të sigurisë së përbashkët.
“Zyrtarët amerikanë e kanë bërë të qartë përkushtimin ndaj Aleancës , duke përfshirë prezencën e Shteteve të Bashkuara në Evropë dhe roli parandalues dhe mbrojtës i NATO-s duhet të qëndrojë i fuqishëm. Si pjesë e kësaj, SHBA ka bërë të qartë pritshmërinë që Aleatët e NATO-s të bëjnë më shumë, të investojnë më shumë dhe të prodhojnë më shumë në mbështetje të sigurisë së përbashkët. NATO është gjithmonë në proces adaptimi për t’u përshtatur me një mjedis në ndryshim. Kjo është pjesë e asaj që kërkohet për të mbajtur gatishmërinë”, thuhet nga NATO.
