Politologu, Avdi Smajlaj ka thënë se relacioni mes kryeministrit Albin Kurti dhe emisarit për Misione të Posaçme i SHBA-së, Richard Grenell duket sikur është personalizuar.
Sipas Smajlaj deklarata e Grenell se bashkësia ndërkombëtare është e bashkuar kundër Kurtit si përmbajtje vë në pikëpyetje mundësinë e bashkëpunimit mes SHBA-ve dhe kryeministrit Kurti në rast se i fiton zgjedhjet.
“Si përmbajtje deklarata konteston ose të paktën e vë në pikëpyetje mundësinë e bashkëpunimit mes SHBA-ve dhe kryeministrit Kurti në rast se i fiton zgjedhjet dhe bëhet kryeministër i qeverisë së ardhshme. Fillimisht është parë si një deklaratë personale. Si duket ky relacion mes Kurtit dhe Grenell sikur bukur shumë është personalizuar. Ndoshta ka qenë qasja e institucioneve të shtetit ose ndoshta edhe përkrahësve partisë në pushtet të cilët atë polarizimin e brendshëm që ekziston mes partive sikurse e kanë zhvendosur edhe në nivelin ndërkombëtar në relacionet, në këtë rast me Grenellin”, ka thënë ai në emisionin “Këndi i Debatit” në Tëvë1.
Emisari për “Misione të Posaçme”, Richard Grenell dy ditë më parë ka deklaruar se bashkësia ndërkombëtare është e bashkuar kundër kryeministrit Albin Kurti.
Sipas tij retorika e përdorur nga Kurti tani, duke pretenduar se është i afërt me SHBA-në dhe më mirë se të gjitha qeveritë e tjera të Kosovës, është absolutisht e rreme.
“Administrata Trump ka punuar dhe do të vazhdojë të punojë drejt paqes për të gjithë në Ballkan. Por ne kemi nevojë për partnerë të besueshëm. Qeveria Kurti nuk ishte e besueshme as gjatë mandatit të parë të Trump, as gjatë mandatit të Bidenit. Si republikanët ashtu edhe demokratët e kanë kritikuar vazhdimisht Kurtin për ndërmarrjen e veprimeve të njëanshme që destabilizojnë rajonin. Po ashtu edhe BE-ja dhe NATO-ja. Bashkësia ndërkombëtare është e bashkuar kundër Kurtit. Kompanitë amerikane po zgjerohen në Shqipëri dhe Serbi por nuk po zgjerohen në Kosovë për shkak të Kurtit. Kurti ka qenë gjithashtu kundër çdo ideje amerikane të ofruar nga presidentët Clinton, Bush, Obama, Biden dhe Trump. Retorika e përdorur nga Kurti tani, duke pretenduar se është i afërt me SHBA-në dhe më mirë se të gjitha qeveritë e tjera të Kosovës, është absolutisht e rreme. Mos u mashtroni”, ka shkruar Grenell në platformën “X”./teve1.info/
