Trajneri Arne Slot ka thënë se mundësia për të punuar në njërin nga klubet më të mëdha në botë ishte shumë e vështirë për t’u injoruar pasi u konfirmua në krye të Liverpoolit.
Slot ka firmosur kontratë trevjeçare me Liverpoolin, ndërsa punën do ta nis më datën 1 qershor. Ai në postin e trajnerit tek Liverpooli do ta zëvendësoj gjermanin Jurgen Klopp, ndërsa ekipi anglez ka paguar 10 milionë euro dëmshpërblim për t’ia shkëputur kontratën me Feyenoordin.
“Nuk është e lehtë të largohesh nga një klub me të cilin ke përjetuar momente të mira, por në anën tjetër nuk mund ta refuzosh mundësinë për të punuar në Premier League dhe atë në njërin prej klubeve më të mëdha në botë”, ka thënë Slot.
45-vjeçari ka qenë trajner i Feyenoordit prej vitit 2021 dhe më këtë ekip e ka fituar titullin dhe kupën e Holandës, ndërsa ka punuar edhe te AZ Alkmaari.
