Skuadrat nga Kosova që do të paraqiten në raundin e dytë kualifikues të Ligës së Konferencës, kanë mësuar kundërshtarët eventual, me të cilët do të përballen në rrethin e tretë të kësaj gare.
Ballkani, Llapi dhe Drita janë në raundin e dytë kualifikues të Ligës së Konferencës, ndërsa shorti për rrethin e tretë është tërhequr të hënën.
Për dallim prej Ballkanit e Dritës që do të kenë kundërshtarë dukshëm më të lehtë nëse avancojnë nga raundi i dytë, një gjë e tillë nuk mund të thuhet edhe për skuadrën e Llapit nga Podujeva.
Ballkani në rethin e dytë përballet me Hamrun Spartans nga Malta, me ndeshjen e parë që luhet të martën në Kosovë.
Drita do të ketë punë me Breidablikun e Islandës, ndërsa Llapi me Brondbyn e Danimarkës, ndeshje që do t’i luajnë të enjten mbrëma në udhëtim.
Ballkani që u eliminua nga Liga e Kampionëve, nëse e eliminon Hamrun Spartans të Maltës në raundin e dytë, atëherë në të tretin do të ketë punë me ekipin nga Irlanda e Veriut Larne.
Drita që garat evropiane i nis prej rrethit të dytë kualifikues të Ligës së Konferencës, në raundin e tretë do të përballet me fituesin e duelit FK Auda – Cliftonville, kundërshtar të kalueshëm për ekipin nga Gjilani.
Ndërkohë, Llapi në rast se kalon ekipin e madh nga Danimarka, atëherë në raundin e tretë të Ligës së Konferencës, e pret fituesi i përballjes Legia Varshava – Caernaforn Town.
Llapi garat evropiane këtë sezon i nisi në raundin e parë kualifikues të Ligës së Evropës por u eliminua nga Wisla Krakowi e Polonisë.
Ndeshjet e para të raundit të tretë kualifikues të Ligës së Konferencës, do të luhen më datën 8 gusht kurse ato të kthimit pas një javë.
