Edhe sot, si çdo 17 prill mori rrugën për te varrezat e viktimave të Masakrës së Poklekut.
E në mesin e 54 martirëve që u vranë e më pas edhe u dogjën 26 vite më parë, 14 prej tyre ishin të familjes së Skënder Muqollit.
Dhimbjen për familjarët e ka të madhe, por akoma më të vështirë ia bën humbja e mbesës e cila ishte vetëm 6 muajshe në atë kohë.
“Kisha me cek që vajza e vëllait Liria ka qenë vetëm gjashtë muajsh. Në asnjë rrethanë një fëmijë gjashtë muajsh i cili as emrin nënë nuk mundi ta shqiptojë të vritet në atë formë e më pas të digjet deri në copat më të vogla”, ka thënë Muçolli
Emocione, dhimbje, e mërzi ka kur kujton kohën se si e mori lajmin që anëtarët e familjes së tij ranë pre e armikut.
“Takohemi me disa njerëz të cilët nuk i njihnim vetëm që i pyetëm a dinin diçka nga fshati Poklek, pa e ditur ai se kush jemi ne, tregon thotë po në shtëpinë e Sinan Muqollit, Sinanin, e kanë mbyt me krejt familjen pa e ditur ai që unë jam djali i Sinanit. Ka qenë moment shumë i vështirë, vështirë i përballueshëm. Nëse mund ta definoj mungesën e dëshirës për jetë e kujtoj atë moment”, thotë ai.
E momentet e fundit me nënën, Skënderi aso kohe 15 vjeçar, i ka të freskëta edhe sot e kësaj dite.
“Kisha me përmend momentin e fundit si sot para 26 vitesh rreth orës 05:00 të mëngjesit, kur ka dalë nëna na ka përcjell për të dalë prej shtëpisë. Ndoshta është ai momenti më i mirë kur e shoh atë fytyrën e nënës kur lutet për fatin tonë”, tregon Muçolli.
Ani pse ishte i pikëlluar, Muqolli thotë se forcën e gjeti te amaneti që i la ajo.
“E kam pas një amanet nga nëna që të shkollohem, e fal tij unë kam vazhduar e sot jetoj me një familje të konsoliduar, kuptohet me amanetin e nënës në vend”, shprehet ai.
Këtë masakër e ka përkujtuar presidentja Vjosa Osmani e cila tha se është një plagë e cila nuk mbyllet pa drejtësi.
Derisa homazhe në Poklek bëri edhe kryeministri në detyrë, Albin Kurti.
