Nga Prishtina drejt veriut të Kosovës, pjesëtarë të Policisë së Kosovës dhe të KFOR-it po e ruajnë sigurinë përgjatë gjithë rrugës.
E situata ishte e qetë gjatë së mërkurës në Leposaviq, Zveçan e Zubin Potok.
Numër i vogël i protestuesve u pa para komunës së Leposaviqit.
Ata po qëndrojnë në tendat që i kanë vendosur tash e një muaj përballë komunës.
Por ndryshe nga këtu, në Zveçan numri i protestueve ishte më i madh.
Kohën e tyre po e kalojnë të ulur në tenda e duke zhvilluar biseda. Në këtë komunë edhe gjatë ditëve të kaluara numri i serbëve të grumbulluar para objektit të komunës ishte më i madh.
Ndërkaq në hyrje të Zubin Potokut u panë forca të shtuara të KFOR-it. Megjithatë edhe tek kjo komunë pati pak protestues. E pavarësisht kësaj, Policia e Kosovës vazhdon të qëndrojë në afërsi të objektit komunal.
Gjendja ishte e qetë gjatë së mërkurës dhe në lagjen e Boshnjakëve.
Forca të shtuara policore, po patrullonin rrugës që të dërgojnë në Gazimestan, aty zakonisht mbahej festa e Vidovanit, ndonëse e njëjta kësaj radhe u mbajt në Manastirin e Graçanicës.
Qytetarë serbë që erdhën për të marrë pjesë në këtë organizim, u panë me autobus teksa po ktheheshin, pas përfundimit të festës së tyre.
