Kryetari i Komunës së Suharekës, Bali Muharremaj, ka shprehur gatishmëri për të ndihmuar Komunën e Malishevës, pasi që mbi 200 persona dyshohet se janë helmuar me ushqim të shpejtë në një lokal ushqimor.
Muharremaj, potencon se ekipet shëndetësore të Suharekës janë të gatshme të ndihmojnë dhe asistojnë kurdo që është nevoja, raporton teve1.info
“Ekipet tona shëndetësore nga komuna jonë, janë të gatshme t’ju ndihmojnë dhe asistojnë kurdo që e kanë të nevojshme. Për këtë rast kam biseduar edhe me Kryetarin z.Ekrem Kastrati, duke e shprehur gatishmërinë tonë”, ka shkruar Muharremaj në Facebook.
Tutje, kryetari i Suharekës është shprehur optimist se institucionet shëndetësore në Komunën e Malishevës do t’ia dalin, dhe se me profesionalizëm është duke u punuar në mënyrë që të tejkalohet mbarë situata.
“Natyrisht, që institucionet shëndetësore në Komunën e Malishevës do t’ia dalin me situatën e fundit të helmimit, dhe se me profesionalizëm po punohet në tejkalimin e kësaj situate”.
Ndërkohë, numri i të helmuarve ka arritur në 205, kështu njoftoi për teve1.info drejtori i QKMF-së në Malishevë, Afrim Krasniqi.
Krasniqi bëri të ditur se gjendja e pacientëve është stabile dhe e qetë.
“205 është rritur numri i personave të helmuar. Për momentin kemi një situatë të qetë dhe të gjithë pacientët janë jashtë rreziku për jetë”, tha Krasniqi.
Agjencia e Ushqimit dhe Veterinarisë ka marrë vendim që të mbyllet përkohësisht lokali, teksa pas marrjes së disa mostrave ka asgjësuar mbi 60 kilogram mish.
Zëdhënësi i Agjencisë së Ushqimit dhe Veterinës, Lamir Thaçi, ka bërë të ditur se në atë lokal është vërejtur që gjendja e përgjithshme teknike, sanitare, higjenike ka qenë në nivelin jo të mirë si dhe janë gjendur produkte që nuk kanë pasur dokumentacion mbështetës për tu ditur origjina e tyre.
Ndërkaq, lidhur me rastin është arrestuar një person, për të cilin Prokuroria Themelore në Gjakovë ka kërkuar caktimin e masës së paraburgimit./teve1.info/
Helmimi i qindra personave në Malishevë, AUV: Në lokal janë gjendur produkte pa origjinë
