Shteti i Sirisë ka njohur pavarësinë e Kosovës.
Lajmin e ka bërë të ditur presidentja e Kosovës, Vjosa Osmani.
Ajo ka thënë se kjo është arritur falë mbështetjes së Princit të Kurorës së Arabisë Saudite, Muhammed bin Salman Al Saud.
“Me mbështetjen e Lartësisë së tij Mbretërore, Princit të Kurorës së Arabisë Saudite, Muhammed bin Salman Al Saud, sot ne Riad arritëm marrëveshjen nëpërmjet së cilës Republika Arabe e Sirisë njeh Republikën e Kosovës. Falënderoj Presidentin Al Sharaa për vendimin për njohje të Kosovës si dhe për mbështetjen e tij për popullin tonë”, ka shkruar Osmani.
Ajo ka thënë se populli i Kosovës dhe ai i Sirisë kanë vuajtur e shumë për të arritur lirinë dhe njohja e ndërsjellë sot, është edhe njohje e sakrificave.
“Populli i Kosovës dhe ai i Sirisë kanë vuajtur e sakrifikuar shumë për ta arritur lirinë. Prandaj kjo njohje e ndërsjellë sot nuk është vetëm e sovranitetit shtetëror, por edhe njohje e sakrificës së shumë brezave për të jetuar të lirë. Falënderoj Princin e Kurorës së Mbretërisë së Arabisë Saudite që e bëri të mundshëm këtë akt historik ndërmjet dy shteteve tona. Tani Kosova njihet nga 120 shtete. Republika jonë po ecë përpara dhe nuk ka asgjë që mund ta ndalë”, ka thënë ajo.
Në dhjetor të vitit të kaluar në Siri përfundoi lufta civile kur al-Sharaa dhe një grup luftëtarësh rebelë përmbysën qeverinë e diktatorit Bashar al-Assad.
Sharaa, i njohur edhe me pseudonimin e tij luftarak Abu Mohammad al-Julani, ishte komandanti i përgjithshëm i Hay’at Tahrir al-Sham (HTS), një grup rebel i cili udhëhoqi ofensivën e lehtë të forcave antiqeveritare që çoi në rrëzimin e regjimit të Asadit në më pak se dy javë.
Al-Sharaa ishte udhëheqësi de facto i Sirisë i qeverisë së përkohshme pas revolucionit nga 8 dhjetori 2024 deri më 29 janar 2025, kur u emërua presidenti i Sirisë në Konferencën e Fitores së Revolucionit Sirian të mbajtur në Pallatin e Popullit.
Bashar Assad, udhëheqësi i Sirisë për gati 25 vjet, iku në Rusi pasi grupet anti-regjim morën kontrollin e Damaskut më 8 dhjetor, duke i dhënë fund regjimit të Partisë Baath, e cila kishte qenë në pushtet që nga viti 1963.
