Fillimi i kësaj jave solli edhe sinjalet e para të mundësisë së deeskalimit të situatës në pjesën veriore të vendit.
I dërguari i posaçëm i Bashkimit Evropian për dialogun Kosovë-Serbi Miroslav Lajcak dhe zëvendëskryeministri i Kosovës Besnik Bislimi, pas takimit të së hënës në Bratisllavë, njoftuan se janë dakorduar për hapat e parë drejtë deesaklimit të situatës, por pa treguar detaje.
Profesori universitar, Milazim Krasniqi thotë se deeskalimi ka filluar dhe se largimi i protestuesve, policisë e të tjerëve nga komunat veriore, janë procese të sinkronizuara.
“Ka ditë që në fakt ka filluar deesaklimi sepse nuk ka më as arrestime as ndërhyrje në veri, kështu që deesakalimi në terren ka filluar. Në anën tjetër, kjo interpretimet e pikave të Bashkimit Evropian, janë vetëm si me thënë humor i keq. Për ndryshe largimi i forcave policore, largimi i kryetarëve nga komunat, largimi i protestuesve janë procese të sinkronizuara edhe ato nuk tregojnë ndonjëfar hierarkie, por janë pika që duhet të bëhen për të filluar deeskalimi”, deklaroi Krasniqi.
Njohësi i çështjeve politike, Dritëro Arifi, thotë se pavarësisht rrugës drejtë deeskalimit Qeveria e Kosovës duhet të jap llogari për masat apo sanksionet me të cilat po përballet Kosova.
“Në fund të ditës ato tre pika kanë me u zbatu, edhe është e kuptueshme që qytetarët serb duhet me u largu nga rruga, sepse ndryshe nuk ka logjikë me funksionu sundimi i rendit dhe ligjit. Por, nuk është çështja aty, sanksionet janë aty, pra Qeveria e Kosovës duhet të jap llogaridhënie dhe përgjegjësi pse kanë ardhë sanksionet, pra kjo është një çështje shumë më e rëndësishme se sa a kanë me u largu ata qytetarë apo jo. Pra Qeveria e Kosovës prej gabimit në gabim, po gëzohet për diçka që ka mundur të bëhet pa i marr sanksionet. Në momentin që Kosova është sanksionuar çdo justifikim i qeverisë është i kotë”, tha Arifi.
I dërguari i Shteteve të Bashkuara në bisedimet Kosovë -Serbi, Gabriel Escobar, ka thënë se hapi i pari drejt deeskalimit të situatës duhet të jetë largimi i njerëzve nga rruga, në komunat veriore. Nga Vetëvendosje thonë se plotësimi i kësaj pike, mund të qoj në deeskalim.
