Këshilltarja politike e kryeministrit Albin Kurti për Luginën e Preshevës, Ardita Sinani, po pretendon se Kuvendi Komunal i Bujanocit ka zhvilluar sot një seancë në errësirë informative.
Sipas Sinanit, kjo seancë është ftuar me sms të dërguar nga sekretaria e Kuvendit kryetarëve të grupeve të këshilltarëve dje pasdite.
Ajo thotë se kjo seancë u ftua me qëllim që t’i zgjatej jeta politike kryetarit të komunës së Preshevës, Shqiprim Arifit.
“Është zgjatje e jetës politike, sepse ditëve të fundit, pakënaqësitë me udhëheqjen e pushtetit lokal përveç se nga jashtë taborit politik të shumicës, ato u shpërfaqën edhe brenda tij”, ka shkruar ajo.
Sinani tutje ka shkruar se Arifi ka marrëveshje të fshehta me Listën Serbe.
“Mbase do të dalin në pah edhe marrëveshjet e errëta me Listën serbe, grupacion politik që dihet botërisht që vendimet politike për të qenë apo jo të përfshirë në ndonjë akrobacion të tillë si ky i sotshmi, i merr nga qendra në Beograd. Gjegjësisht nga Aleksandër Vuçiqi”, ka shkruar ajo.
“Tash çdo shqiptar në Preshevë, Luginë e kudo, e ka kuptuar pse Shqiprim Arifi me plot “guxim” çirret ndaj institucioneve të Republikës së Kosovës e Shqipërisë, e nuk guxon të thot asnjë fjalë për shefin e BIA që Thesari shtetëror amerikan i shpall sanksione”, vazhdon Sinani.
