Kryetarja e deritanishme Ardita Sinani ka thënë se ndaj saj, Shqiprim Arifi dhe Sami Salihu, kanë kryer sot puç.
”Sikurse pushteti i tyre në Preshevë, Shqiprim Arifi dhe Sami Salihu, janë tashmë në anën e kundërt të popullit. Janë pakica ekstreme e tij. Siç u pa edhe sot, kur shumica dërmuese e përfaqësuesve politikë të Luginës ishin te Kryeministri i Kosovës, ndërsa ata dy të vetmuar dhe të izoluar, në errësirën e “bunkerit” të tyre puçist, në periferitë e Preshevës. Nga aty kaluan padinjiteshëm në administratën komunale”, ka shkruar Sinani.
Ajo tha se pushtet i ri në Preshevë është produkt i degradimit të politikës shqiptare në Luginë
“Presheva ka nevojë urgjente për zgjedhje të reja për ta ndërtuar një qeverisje legjitime nga vota e popullit dhe jo nga pazaret e individëve vendorë dhe rajonal. Puçistët nga lartë e kanë tashmë makth të përditshëm përballjen me popullin, prandaj edhe do ta bëjnë të pamundurën me shty deri në ditën e fundit ballafaqimin me kutitë e votimit”, ka shtuar tutje ajo.
Sinani ka kërkuar mobilizim dhe organizim nga të gjithë qytetarëtpër ta kundërshtuar këtë “puç”
“Mobilizohemi, organizohemi dhe angazhohemi. Ju të gjithë, që nuk pajtoheni sot me politikën puçiste të Shqiprim Arifit dhe Sami Salihut, ju ftoj të na bashkoheni, për t’iu bërë me dije nesër se Presheva dhe Lugina janë të preshevarëve dhe luginasve, e jo të individëve të papërkrahur nga populli. Shumica jemi për një Luginë dhe Preshevë me politikë të përgjegjshme vendore, me unitet të brendshëm dhe në bashkërendim me Shqipërinë dhe Kosovën. Prandaj ne bashkërisht do të fitojmë dhe ata dy do të humbin”,ka shkruar ajo./teve1.info/
