Në Gjykatën Themelore të Ferizajt sot do të mbahet shqyrtimi fillestar ndaj Leutrim Fejzës, i cili akuzohet për vrasjen e Bekim Varit.
Në seancën e sotme janë të pranishëm edhe familjarë të viktimës Bekim Vari dhe të të akuzuarit Leutrim Fejza.
Bekim Vari ishte raportuar si i zhdukur më 29 janar 2025, ndërsa trupi i tij i pajetë ishte gjetur më 5 shkurt 2025 në një zonë malore të fshatit Manastirc të Ferizajt.
Sipas aktakuzës së ngritur nga Prokuroria, Leutrim Fejza dyshohet se e ka vrarë Bekim Varin dhe më pas e ka groposur trupin e tij.
Në njoftimin e Prokurorisë Themelore të Ferizajt, thuhet:
“Sipas aktakuzës së Prokurorisë, ekziston dyshimi i bazuar se më datë 23 janar 2025, në intervalin kohor prej orës 18:30 – 20:06 minuta, në fshatin Pleshinë e Ulët, në pjesën malore në afërsi të rrugës ‘Rilindja’ të fshatit Manastirc – komuna Ferizaj, i pandehuri L.F., me dashje dhe në mënyrë dinake, ka privuar nga jeta tani të ndjerin B.V.
Fillimisht, një ditë para ngjarjes kritike, më 22 janar 2025, i pandehuri së bashku me të ndjerin kishin vendosur që të shkonin në një vilë në malet e fshatit Burrnik – komuna Ferizaj, ku edhe më parë kishin qenë. Pas furnizimit me ushqim, rreth orës 16:00, i pandehuri me një person të paidentifikuar e mori viktimën nga shtëpia e tij me një automjet të tipit kamionetë, ngjyrë të bardhë, dhe u nisën drejt vendit të quajtur ‘Te Podi’.
Rrugën deri tek vila e vazhduan në këmbë nëpër mal, ku qëndruan deri të nesërmen pasdite. Më pas, nëpër malet e fshatit Pleshinë, ata u nisën për t’u kthyer në shtëpi, por për shkaqe të panjohura devijuan rrugën dhe morën drejtimin për në fshatin Manastirc. Aty, për motive ende të panjohura, i pandehuri e privoi nga jeta viktimën duke e qëlluar në kokë me armën që e kishte me vete – një pushkë gjysmë automatike të tipit kallashnikov – duke i shkaktuar plagë vdekjeprurëse, siç është konstatuar në raportin e autopsisë.
Pas vrasjes, trupi i viktimës u mbulua me dhe, drunj dhe dushkë. Më 5 shkurt 2025, trupi i pajetë i të ndjerit u gjet nga disa qytetarë. Me këtë, i pandehuri dyshohet se ka kryer veprën penale ‘Vrasje e rëndë’, nga neni 173, paragrafi 1, nënparagrafi 1.4 i Kodit Penal të Republikës së Kosovës.”
