Drejtoria Rajonale e Policisë në Ferizaj, ka njoftuar se qytetari Bedri Vladi me vështirësi në shëndetin mendor i njohur si “Rambo”, ka marrw trajtim institucional.
Sipas PK-së, kjo është arritur falë bashkëpunimit të institucioneve qendrore, lokale dhe shoqërisë civile.
Sipas një falënderimi publik nga kjo drejtori, ky veprim përveç zbatimit të ligjit është dëshmi e vlerave njerëzore.
“Sot, Drejtoria Rajonale e Policisë në Ferizaj, nën udhëheqjen e Nënkolonel Faton Pllanës, shpreh falënderimet më të thella për të gjitha institucionet qendrore dhe lokale, shoqërinë civile, si dhe për çdo pjesëtar të policisë së rajonit që me përkushtim, bashkëpunim dhe vullnet ndihmuan në trajtimin institucional të Bedri Vladit – qytetarit me vështirësi të shëndetit mendor, i njohur në publik si “Rambo”. Ky veprim nuk është vetëm zbatim i ligjit, por është dëshmi e vlerave njerëzore, e përgjegjësisë kolektive dhe e gatishmërisë për të vepruar kur komuniteti ka më së shumti nevojë. Falë ndërhyrjes suaj, i ofruam ndihmë një njeriu në nevojë dhe njëkohësisht kontribuuam në qetësimin e një shqetësimi të kahmotshëm të qytetarëve tanë. Ky është bashkëpunimi që ndërton besim, siguri dhe humanitet”.
Ndryshe ditë të fundi janë publikuar pamje që ky qytetar kishte bërë disa veprime të rrezikshme.
