Rreth 500 fëmijë me diabet po trajtohen në Klinikën e Pediatrisë në QKUK.
Por nevojat e tyre nuk janë plotësisht të mbuluara.
E me qëllim evokimin për përmirësimin e trajtimit të fëmijëve me diabet, në këtë klinikë u mblodhën mjekë të shumtë, përfaqësues të AMC e organizata të tjera ndihmëse.
Kjo pasi për dhjetë fëmijë, të enjten u siguruan pompa insulinike.
Ndërsa ky donacion kap vlerën e 33 mijë eurove.
“Këto pompa të insulinës kanë një rëndësi të veçantë për arsye se dozimi i insulinës të cilët personat e prekur me këtë sëmundje e marrin është sa më i saktë dozimi i tyre dhe mënyra e përdorimit është më e lehtë, poashtu edhe jeta e tyre do të jetë shumë më e lehtë në të ardhmen”, ka deklaruar drejtoresha e Klinikë së Pedriatrisë, Violeta Grajqevci-Uka.
Por përveç kësaj, u dhuruan edhe materialet shpenzuese për një vit në Pediatri.
“Me dhurimin e sulfaktantit ndër vite ka ngritur vetëdijen dhe ka evokuar që ky medikament të futet në listën e barnave esenciale. Pikërisht këtë po mundohemi ta bëjmë edhe me medikamente të diabetit”, ka thënë Rina Demiri nga AMC.
E ky donacion u mirëprit nga reparti i endokrinologjisë.
“Është gjithashtu një shenjë e solidaritetit dhe përkushtimit për të krijuar një sistem shëndetësor më të barabartë, më të përparuar”, ka deklaruar drejtoresha e Endokrinologjisë, Merita Emini-Sadiku.
“Do të jenë shumë të dobishme në menaxhimin e diabetit dhe janë një dhuratë e jashtëzakonshme për fëmijët”.
Por më së shumti nga e gjithë kjo u gëzua pacientja që do përfitojë një pompë të insulinës.
“Veç du me ju falenderu shumë se pompa insulinike është shpëtim për mu, se jam fëmijë shumë aktiv dhe veç du me ju falenderu”, tha pacientja, Jara.
Në kuadër të këtij aktiviteti, u përurua edhe ‘’Dhoma Rekreative’’ në Klinikën Pediatrike.
Sipas të dhënave në këtë klinikë, në Kosovë janë regjistruar 2 mijë e 455 persona të diagnostifikuar me diabet të Tipit 1, të varur nga insulina.
Ndërsa çdo vit, rreth 40 foshnja lindin me diabet tip 1 dhe trajtohen në Qendrën Klinike Universitare të Kosovës (QKUK).
Ky donacion është rezultat i fushatës “Diabeti nuk ndalon ëndrrat”, e realizuar në partneritet me Korporatën Rugove, si donatorin kryesor të kësaj fushate, dhe me mbështetjen e z. Burbuqe Pacarada, e cila përmes iniciativës së skydiving “Deri në Qiell për Nëna dhe Fëmijë” mblodhi fonde për këtë kauzë.
