Shefi i misionit të EULEX-it, Giovanni Pietro Barbano, u ka shprehur mirëseardhje Njësisë Policore të Specializuar të 5-të (NJPS), të cilët do të mbikëqyrin sigurinë gjatë zgjedhjeve parlamentare të 9 shkurtit në Kosovë.
Lajmin e ka bërë të ditur EULEX-i përmes një komunikate për media.
“Këta policë, që vijnë nga forcat e EUROGENDFOR-it të siguruara nga Xhandarmëria Kombëtare e Francës, karabinierët e Italisë, shërbimi i sigurisë publike i Lituanisë dhe Garda Kombëtare Republikane e Portugalisë, do të punojnë krah për krah me Njësinë Policore të Specializuar (NJPS) të siguruar nga Policia e Polonisë për ta përmbushur mandatin e Misionit për ta mbështetur stabilitetin në mbarë Kosovën dhe për garantimin e sigurisë për të gjitha komunitetet gjatë zgjedhjeve të ardhshme të përgjithshme”, thuhet në komunikatën e EULEX-it.
EULEX-i vepron si reaguesi i dytë i sigurisë në Kosovë në kuadër të mekanizmit me tre nivele të reaguesve të sigurisë, ku Policia e Kosovës është reaguesi i parë i sigurisë, EULEX-i është i dyti dhe misioni KFOR i udhëhequr nga NATO është i treti./teve1.info/
