Sigal Prishtina e ka mposhtur Trepçën me rezultatin e ngushtë në ndeshjen e parë gjysmëfinale të Kupës së Kosovës në basketboll.
Në fakt, Prishtina kishte epërsi mbi 20 pikë ndaj Trepçës në fillim të takimit por fitoren e siguroi në sekondat e fundit, falë gjuajtjeve të lira që i realizoi qendra Rashid Mahalbashiq.
Trepça e pati aksionin e fundit, por amerikani Tekele Cotton nuk ishte i saktë në tentimin për tri pikë dhe kështu fitorja i takoi Prishtinës.
Duelin e luajtur të mërkurën mbrëma në palestrën “1 Tetori” në kryeqytet, Prishtina e fitoi me shifrat 67:65.
Me epërsi prej dy pikëve, Prishtina udhëton në Mitrovicë në tentim për ta siguruar finalen, pasi do të luaj edhe ndeshjen e dytë gjysmëfinale ndaj Trepçës.
Sigal Prishtina e nisi ndeshjen në mënyrën më të mirë të mundshme, duke e mbyllur çerekun e parë me shifrat 25:3.
Tre çerekët në vazhdim i takuan Trepçës, e cila barazoi rezultatin 65:65 në fund por nuk arriti ta mposht Prishtinën.
Qendra Mahalbashiq me 13 pikë e po aq kërcime udhëhoqi Prishtinën drejt fitores, ndërsa me lojë të mirë u veçuan edhe Josh Nzeakor (19 pikë) e Ricky Tarrant (14 pikë).
Te Trepça, më efikasi ishte Drilon Hajrizi me 21 pikë të shënuara dhe 12 kërcime.
