Ky njoftim i familjes Krasniqi, për humbjen e djalit të tyre, Alpi, do të çonte në këmbë Gjilanin dhe jo vetëm.
8 vjeçari, që është edhe me autizëm, i humbi kontaktet me familjen e tij, rreth orës 3 të pasdites së të dielës.
Postimi i familjes që kërkonte ndihmë për gjetjen e tij, u shpërnda shumë herë në rrjetin social facebook.
Por, solli edhe reagim të madh të qytetarëve.
“Për rreth 25 minuta, jemi grumbullu mbi 50 persona. Paraprakisht e kam thirr familjen, i kam marrë disa informacione në lidhje me djaloshin”, tha Arlind Vokshi – iniciator për kërkimin e 8-vjeçarit.
Me t’u grumbulluar, ata kishin nisur me kërkime në disa lokacione.
“Kemi fillu jemi nda në grupe, fillimisht kemi kërkuar nëpër qendra tregtare, në qendër të qytetit, në shesh. Fillimisht aty ku ka pas supozime që e ka frekuentu njërën prej qendrave tregtare në Gjilan, por kjo doli të jetë e gabuar”, thotë Vokshi.
Gjatë kërkimit disa orësh, ata kishin marrë edhe udhëzime se si duhej të silleshin me Alpin në rast se e gjenin.
“Më kanë telefonu psikologë e logopedë që na kanë tregu se si të sillemi me Alpinin, për shkak se ai është me autizëm dhe se si duhet ta trajtojmë një person me autizëm, për shkak se ka mundur të ketë shqetësime”, tregon ai.
Krahas qytetarëve, në kërkim të 8 vjeçarit kishin dalë edhe institucionet e vendit, Policia e FSK-ja, si dhe ekipet e Kërkim Shpëtimit.
“Kërkim shpëtimi e ka gjetë Alpin, në një shtëpi të pabanuar të xhaxhait të tij”, thotë Vokshi.
Familja njoftoi se ai ishte në gjendje të mirë shëndetësore.
