Ndalesa e parë iu bë qysh në hyrje të Kosovës.
Brenda njëautobusi, informacionet paraprake ishin se mund të ketë mallra të kontrabanduara.
E pas një pune intensive të njësisë Antikontrabandë të Doganës së Kosovës në koordinim me Policinë e Kosovës, gjegjësisht njësinë K9, u mësua se brenda tij ishin vendosur qindra kilogramë narkotikë të llojit marihuanë të ardhur nga Shqipëria.
Ndalesa e parë iu bë në dalje të Vërmicës, në afërsi të Prizrenit.
Nga aty, autobusi u soll në terminalin doganor në Fushë Kosovë për kontroll më të detajuar.
Sipas shefit të Njësisë Antikontrabandë, Bekim Shala, dyshimet fillestare lindën gjatë një kontrolli rutinë.
“Ne, si Njësi Antikontrabandë, gjatë kontrollit të rregullt në magjistralen Vërmicë–Prishtinë, në afërsi të Prizrenit, kemi ndalur këtë autobus. Gjatë kontrollit rutinë kemi dyshuar, pasi autobusi nuk kishte udhëtarë dhe gjithashtu kemi dyshuar edhe te shasija e automjetit që mund të ishte e falsifikuar”, deklaroi Shala për Tëvë1.
Ai shtoi se, pas ngritjes së dyshimeve, autobusi është dërguar në terminal për verifikime të mëtejshme.
“E kemi sjellë në terminalin ku ndodhemi tani dhe kemi kryer verifikimet e nevojshme. Gjatë kontrollit të detajuar kemi hasur në mallin, ashtu siç po shihet. Për momentin kemi sjellë skanerin, i cili do ta skanojë autobusin në tërësi, dhe në bazë të atij skanimi do të vazhdojmë me kontroll deri në përfundim”.
Hetimi nuk përfundoi me kaq. Dogana e Kosovës përdori edhe skanerin i cili rezultoi se brenda autobusit kishte ende pako të mbushura me këtë lloj të drogës.
Ngasësi i autobusit u arrestua nga Policia e Kosovës, të cilit iu konfiskuan celularë dhe para që u gjetën në vendin e ngjarjes.
Sipas prokurores së rastit, Habibe Salihu i arrestuari për këtë rast është personi me inicialet B.K.
“Prokuroria Speciale edhe njëherë ju njofton se sasia e narkotikëve të cilët sot janë konfiskuar, është sekuestruar nga personi i dyshuar me inicialet B.K mund të jenë përafërsisht 120 kilogramë ndërsa për llojin e këtij narkotiku tani për tani dyshohet se mund të jetë marihuanë por më vonë pas ekzaminimit do të rezulton më saktësisht se për cilin lloj të narkotikëve bëhet fjalë”.
Ky aksion u realizua në koordinim edhe me drejtorinë antidrogë të Policisë së Kosovës.
“Kemi arritur që të identifikojmë automjetin e dyshuar nga dogana normalisht në bashkëpunim me neve, dhe si rezultat kemi këtë sasi të sekuestruar tani për momentin. Një person është i arrestuar, natyrisht se procedurat do të koordinohen ngushtë me prokuroren pastaj shohim për veprimet shtesë që kërkohen në rastin konkret”, deklaroi Reshat Murseli, drejtor i Drejtorisë së Antidrogës në Policinë e Kosovës.
Pas përfundimit të hetimeve në vendin e ngjarjes, pakot filluan të vendosen në peshë.
Më pas, e gjithë sasia u konfiskua nga Policia e Kosovës.
