Flakët e natës e kthyen ekskavatorin në një mjet të shkrumbuar në Mitrovicë.
Mjet ky i angazhuar nga kompania përgjegjëse për rrënimin e objekteve pa leje, u përfshi nga zjarri këtë të hënë.
Nga Policia kanë treguar që rasti po cilësohet si vepër penale.
“Njësitë përkatëse policore kanë dalë menjëherë në vendngjarje dhe kanë ndërmarrë të gjitha veprimet e nevojshme hetimore. Lidhur me rastin, Policia ka nisur hetimet për sqarimin e rrethanave të përfshirjes nga zjarri të mjetit të punës, ndërsa rasti është iniciuar si vepër penale ‘Zjarrvënie’”, thuhet në njoftimin e policisë së kosovës.
Kryetari i komunës Faton Peci dënon sulmin ndaj kompanisë duke e cilësuar si akt qyqar.
“Sot në orët e para të mëngjesit, pronari i kompanisë që ka qenë i kontraktuam me komunën e Mitrovicës. Për aktivitete të tilla, ku komuna e vlerëson që është e nevojshme dhe e dobishme, është përball me një pasojë, fatkeqësisht djegjës së një bateri, vlera e të cilit sipas pronarit dëmit të shkaktuar është minimalisht 70 mijë euro, për çka edhe e dënoj këtë akt qyqar, makaber dhe kriminal, për shkak se kjo është një kërcënim direkt për gjithë ata që dëshirojnë Mitrovicën me pa në radhë të parë si një qytet normal”, u shpreh Peci.
Peci foli për aksionin që po ndërmerret këto ditë në qytetin e Mitrovicës, dhe theksoi që komuna nuk do lejoj më ndërtime e objekte pa leje në pronën publike.
“Ne jemi të përkushtum me vendos rend, rregull edhe ligjshmëri por njëkohësisht edhe ne si ekzekutiv, edhe si komunë duhet me qenë të përgjithshëm karshi detyrimeve ligjore që i kem, në proces të analizës në të cilën është qyteti i Mitrovicës ka dalë që ka pasë mungesë të vullnetit me i adresu disa prej problemeve që janë grumbullu ndër vite.Në funksion të kësaj ka dal që ka pas një ndërtim pa leje në pronën komunale të stacionit të autobusëve ne një gjë të tillë nuk mund ta lejojm sikurse nuk mund ta lejojmë as vendosjen e objekteve dhe kioskave aty ku është e ndaluar me ligj”, ka thënë tutje Peci.
Sipas kryetarit aksione të tilla do të vazhdojnë deri në lirimin e plotë të të gjitha hapësirave që shfrytëzohen në mënyrë të kundërligjshme.
